'Wɩ ‑ɛɛ 'di nyɔ ɔ ‑sa dɩsaɩn 'a ‑kwɛa' 'sraa
16
Ɛ 'wlua Aarɔn ɔ' "nynuu‑ 'sɔɔn ‑ʋʋ mua 'sraa ‑saa' 'de Nyɔsoa "juɛi 'a 'mɛɛ "kpei 'sʋ Nyɔsoa wluɛ Moisɩ -pee. 2 Ɛ 'na: ‑Ɩn -tmʋʋ ‑ma dedi' Aarɔn ɔ bo 'de tae' fɔ ‑sea ‑ta ‑kwɛai 'pepe ke -ta -kwɩa i 'ʋn 'de paa, -ta kɛ' ‑gbau' ke ɛɛ' -cʋn" nɩa, -wɛe ɔ je 'mɛ -ta 'ma mua 'ma ‑cɛ" 'kwla -saa' 'de bue" 'ʋn 'de kɛ' ‑gbau' "kpei ɛ.3 Ka Aarɔn 'jea ‑ta ‑kwɛai pa sʋn nʋ 'ka ka: Ɔɔ muɛ bli' ‑tɔo ‑ɛ ‑jea dɛsaʋn 'a 'sraa ‑sa ke 'blae ‑gblɔ ‑ɛ ‑jea 'sraa ‑ɛ ‑wee' nɛ dia' ‑sa 'ʋn "dua. 4 Ɔɔ muɛ 'fɛɛn bai" ‑tɔɔn ‑ɛ ‑tea kpɔi" 'ʋn paa', 'fɛɛn ‑paika mɩ ɔ 'e "jri, 'fɛɛn tae' fɔ mɛ ɔ 'jeɛ "kpei bla ‑wɛe ɔ 'je 'fɛɛn tae' fɔ "jru bla. 'Sraa ‑sa "wliiɛ‑ ‑nɩ -bo ɔ ‑kɔ' jrea' ‑wɛe ɔ 'jɩ 'ʋn paa. 5 Israɛ nyʋ a muɔ gbao 'sɔɔn "nyɩa, ɛɛ' due' a muɛ dɛsaʋn 'a 'sraa ‑saa ‑wɛe due' 'je 'sraa ‑ɛ ‑wee' nɛ dia ‑sa.
6 Aarɔn ɔ muɛ bli' beɔ ɔɔ' dɛsaʋn 'a 'sraa 'ʋn ‑saa', ‑wɛe ka nyɔ ɔ nʋa see -wɛe nyɔ 'ɔ dɛsaʋn a -kwɛa, ɔ 'je 'kan nʋ 'de ɔ ke ɔɔ' ‑gbu" ‑sɔn nyʋ 'a ‑tɩ' 'ʋn. 7 'Sʋ ɔ "duɛ -faan" gbao 'sɔɔn ‑nɩ 'ʋn ɔ jɩ 'de Nyɔsoa "juɛi 'de ‑tan 'tan ‑ɛɛ -sɔn nyʋ ke Nyɔsoa 'a ‑gbʋʋan "i paana'. 8 Ɔɔ muɩ ɩa' nʋe i 'wlaa ‑wɛe dɛ ‑ɛ ‑nɩa Nyɔsoa 'a ‑nɩ ɔ 'jeɛ 'je, 'de ‑jɛa Asasela -nɩ nɩɛ ɔ 'jeɛ juo‑. 9 Ɔ -kɔa nʋe i 'wlaa, ɔɔ muɛ ‑jɛ ‑teea kpɔi" 'de Nyɔsoa 'a ‑nɩ ‑tɩ' 'ʋn 'de 'kpaa, ‑wɛe ɔ 'jeɛ dɛsaʋn 'a -kwɛa' 'sraa ‑saa. 10 'De -faan" gbao ‑jɛ -nɩa Asasel 'a -nɩ ɛ, ɛ se 'mɛ i nyʋ 'jeɛ 'e Nyɔsoa "juɛi ja-, ɛmɛ nyʋ 'jee to ‑wɛe nyʋ 'a dɛsaʋn 'jeɛ "kpei nɩ ‑wɛe nyʋ 'jeɛ inʋ ɛ 'jee ‑pɩɩɔn" blua "kpei mu 'de Asasel o.
11 Aarɔn ɔ muɛ bli' beɔ 'sraa 'ʋn ‑saa' 'de ɔɔ' ‑cɛ" ɛ dɛsaʋn 'a -kwɛa' 'a ‑tɩ' 'ʋn, -wɛe ka nyɔ ɔ nʋa -wɛe nyɔ 'ɔ dɛsaʋn a -kwɛa ɔ 'je 'kan nʋ 'de ɔ ke ɔɔ' ‑gbu" ‑sɔn nyʋ 'a ‑tɩ' 'ʋn. Ɔɔ muɛ bli' beɔ ‑nɛ ‑pliɔn' cɛan' 'de ɔɔ' dɛsaʋn -kwɛa' 'a ‑tɩ' 'ʋn. 12 Ɛ 'wlʋɛ ‑mɛ "kpei ɛ ɔɔ muɛ paifɛn' 'ɛ "jri podɛ nɛklɩn' ‑nɩa 'de "kpa "kpei 'de Nyɔsoa "juɛi "jia, ‑wɛe ɔ 'je paifɛn' pʋ 'a kwa 'a nya 'sɔɔn "jii‑, ‑wɛe ka ɩ ‑wee' ‑tia ɔ 'jɩ 'de tae' fɔ 'de kpa. 13 'De ‑mɛ 'deɛ, ɔɔ muɛ paifɛn' 'de nɛ "kpei pooa' 'de Nyɔsoa "juɛi, ka ɛɛ' dao' 'jea ‑ta ‑kwɛai 'pepe Nyɔsoa 'a kɛ' ‑gbau' ‑tea 'mʋʋa‑ bɛɛ‑. ‑Bo ɛ nɩ 'kan ‑mɛ ɔ se 'mɛ i. 14 Ɔɔ muɛ ‑cɩɛ nʋa' ɔ 'je ɛɛ' nmɔ 'ʋn "duo ɔ 'jeɛ kɛ' ‑gbau' blaa‑ 'de 'jrʋ 'a 'wlʋɩn fɔo, ɔɔ muɛ kɛ' ‑gbau' 'a "juɛi fɔo blaa 'kan kpɛ ‑mɛ" 'sɔn. 15 Ɔɔ muɛ -faan" gbao -ɛ ‑jea Israɛ -nyʋ 'a dɛsaʋn -kwɛa' 'a 'sraa ‑sa ‑pliɔn' cɛan', ‑wɛe ɔ 'je ɛɛ' nmɔ 'de tae' fɔ 'de kpa, ka ɔɔ nʋa bli beɔ ɔ' nmɔ 'ka ɔɔ mua ɛɛ' nmɔ nʋa' ‑ke: Ɔɔ muɛ ɛɛ' nmɔ ‑ta ‑kwɛai "kpei ke 'de ɛ "juɛi blaa'.
16 'De -ta -kwɛa i 'pepe ɛ, ka nyɔ ɔ nʋa -wɛe ɛɛ -kwɛa i ɛ 'ka Aarɔn nʋ, dɛ‑nʋɛ' mɛ -nɩ Israɛ -nyʋ 'a -maa' 'je dɛwɔn ke ʋa' dɛsaʋn kpʋɛ -flɛn". 'Kamɔ ɔ nʋ 'de ‑tan 'tan ‑ɛ ‑sɔn nyʋ ke Nyɔsoa 'a ‑gbʋʋan "i 'a ‑tɩ' 'ʋn ke-, dɛ dɛ‑nʋɛ' ɛ pooɛ "jɛi 'de ʋʋ ke ʋʋa dɩsaɩn 'a ‑kwea. 17 Nyɔ "oo nyɔ jrɔ' se 'e ‑tan 'tan ‑ɛɛ ‑sɔn nyʋ ke Nyɔsoa 'a -gbʋʋan "i 'di nɩ ɩ, nɔ" -ɛɛ 'di Aarɔn pa 'e -wɛe ɔɔ -sa dɛsaʋn 'a -kwɛa' 'a 'sraa mamaʋ 'sʋ ɔɔ jea "kpae de a ji. Ɔɔ muɛ ɛɛ' dɛtu nʋa' 'de ɔɔ' ‑cɛ" kpa 'a dɛsaʋn -kwɛa' 'a ‑tɩ' 'ʋn, 'de ɔɔ' ‑gbu" ‑sɔn nyʋ ke Israɛ nyʋ ‑wee' "klein 'a ‑tɩ' 'ʋn.
18 ‑Bo ɛ 'wlʋ ‑mɛ "kpei ɛ ɔɔ muɛ "kpae "siia ɔ 'je "kpa ‑nɩa 'e Nyɔsoa "juɛi o fɔo muu‑ ‑wɛe ɔ 'je ka nyɔ ɔ nʋa see -wɛe dɛjrɛ' ɛ ‑kwɛa i ɔ 'je 'kan nʋ. Ɔɔ muɛ bli' beɔ ke -faan" gbao a nmɔ 'ʋn "dua' ‑wɛe ɔ 'jɩ "kpa 'a -gblʋn "klein kui blaa‑. 19 ‑Wɛe ɔ 'je ɔɔ' ‑cɩɛjɔ nʋ ɔ 'je nmɔ ‑gba kpɛ ‑mɛ" 'sɔn 'de "kpa "kpei. 'Kamɔ ɔ 'je nʋ ‑wɛe ɛ 'je i ‑kwɛ 'de Israɛ nyʋ 'a dɛsaʋn 'a ‑tɩ' 'ʋn ‑wɛe ɛ 'je kpɔi" ‑teeɛ.
20 ‑Bo ɔ ‑kɔ' ka nyɔ ɔ nʋa see -wɛe dɛjrɛ' ɛ ‑kwɛa i nʋa' 'de ‑ta kwɛai 'pepe ke, nyʋ ke Nyɔsoa 'a "i ‑gbʋʋna' ke, "kpa ke, 'sʋ ɔ ja -faan" gbao ɛ ‑nɩa 'kmʋ 'mɛ. 21 Ɔɔ muɛ ɔɔ' 'sɩn sɔɔn' 'de -faan" gbao "jru ‑tea' ‑wɛe ɔ 'je Israɛ -nyʋ 'a se dɛwɔn 'je o, ʋʋa' dɩsaɩn ke dɩ "klein ʋʋ 'kɔɔa wɔn ‑sa 'de ɛ "kpei. 'Kamɔ ɔ 'jɩ -faan" gbao ‑nɛ "jru nɛɛ-, ‑wɛe nyɔ nyʋ ‑sae' mu ‑ɔ ‑tea ɛɛ' inʋa' 'a ‑tea' ɔ 'jeɛ inʋ ‑wɛe ɛ 'jee ‑pɩɩɔn" blua "kpei mu. 22 ‑Bo "ju ‑ɔ ‑tea ɛɛ' ‑tea' nʋɛ i, ɛ ke ʋʋa' dɩsaɩn 'a muɛ 'e 'blʋa ‑ɛ "kpei dɛjrɛ' sea nɩ mua'.
23 Aarɔn ɔ muɛ 'de nyʋ ke Nyɔsoa "i ‑gbʋʋna' mua', ‑wɛe ɔ 'je ɔɔ' 'fɛɛn "wliiɛ‑ ɔ paa 'ʋn ɔɔ jea ‑ta ‑kwɛai 'pepe pa 'ʋn ‑sa, ‑wɛe ɔ 'jɩ i ‑te' 'mʋʋa-. 24 Ɔɔ muɛ jrea' 'de ‑ta ‑kwɛai, ‑wɛe ɔ 'je ɔɔ' 'sraa ‑sa ‑bai" ‑ɩ ‑sia 'e 'ʋn paa-, ɔ 'je "kpae "si ‑wɛe ɔ 'je ɔmɔ o, Israɛ nyʋ 'a 'sraa ‑ɛ ‑wee' nɛ dia' ‑sa, 'de -mɛ 'de ɛ ka nyɔ ɔ nʋa see -wɛe dɛsaʋn- a ‑kwɛa ɔ 'je 'kan nʋ 'de ɔmɔ o Israɛ nyʋ 'a dɛsaʋn 'a ‑kwɛa' 'a -tɩ' 'ʋn. 25 Dɛ ɔ ‑saa 'sraa 'ʋn 'de dɛsaʋn -kwɛa' 'a ‑tɩ' 'ʋn, ɔɔ muɛ ɛɛ' 'cna "jri pooa' 'de "kpa "kpei.
26 "Ju nyʋ ‑sae' ‑wɛe ‑ɔɔ kpa -faan" gbao nyʋ 'nɛɛ a nyʋ 'a dɛsaʋn "kpei 'de -pɩɔn" blʋa "kpei ɛ, ɔɔ muɛ ɔɔ' 'ʋnpaadɩ wɔɔa' -wɛe ɔ 'je jre- ‑wɛe ɔ 'je ‑ta ʋʋpʋ a ‑kwlea' pa. 27 Bli' beɔ ɛ ke -faan" gbao nyʋ ‑saa dɛsaʋn -kwɛa' 'a 'sraa 'ʋn ‑wɛe ‑ɛɛ nmɔ nyʋ kpa 'e ‑ta ‑kwɛa i 'pepe 'mʋʋa‑ ka nyɔ ɔ nʋa see -wɛe dɛsaʋn- a ‑kwɛa ɔ je 'kan nʋ, nyʋ 'je ɩa' ku o, ɩa' nmi ke ɩa' "nyni "jri po 'de dɛkpɔ 'de. 28 Nyɔ ‑ɔɔ muɩ "jri poa' ‑nɔ ɔɔ muɛ ɔɔ' "wliiɛ‑ wɔɔa', ɔɔ muɛ jrea' ‑wɛe ɔ 'je ‑ta ʋʋa' ‑kwlea' pa.
29 Ɩa muɛ aoa' kɛ' nɩa' ao 'je ikpʋn 'de nɔ" "oo nɔ" ‑wee' 'di. 'Cʋ ‑mɛ" 'sɔn ɛɛ' 'wɩ ‑puue ‑nɛ di ɛ, aoa muɛ wɔn 'bɔa ao se dɛ jrɛ' nʋɩ 'de ɛɛ' 'wɩ tu 'di, ao mɔ o dʋɩ ‑nɩa 'de aopʋ "klu ‑ke. 30 Dɛ ‑nʋɛ mɛ ‑nɩ ɛɛ' 'wɩ tu o ɛ, ɛmɛ ka nyɔ ɔ nʋa -wɛe nyɔ 'ɔ dɛsaʋn 'a ‑kwɛa' nyɔ 'je 'kan nʋ 'de ao "kpei ‑wɛe ‑bo ɛ nɩ 'kan 'de aoa' dɛsaʋn 'je ‑kwɛ ‑wɛe ao 'je 'pepe nɩ 'de Nyɔsoa "juɛi. 31 Ɛ 'je saba nɩ 'wɩ ‑ɛɛ 'di ao sea dbo jrɛ' nʋɩ ɛ, ɛɛ' 'wɩ tu 'di ɛ aoa muɛ wɔn 'bɔa ɩ nɩɛ aoa' kɛ' ‑o 'de nɔ" "oo nɔ" ‑wee' 'di. 32 'Sraa ‑sai nyɔ poa 'cna "jru ‑wɛe ɔ ‑nɩa 'sraa ‑saa' 'de ɔ "bo 'a -kɔi" ɔmɔ ‑je dɛsaʋn 'a ‑kwɛa ke i -kwɛa' 'a 'sraa ‑sa. Ɔɔ muɛ 'fɛɛn wliiɛ ke "wliiɛ ‑kwɛai 'ʋn paa'. 33 Ɔɔ muɛ ‑ta ‑kwɛai 'pepe o, ‑tan 'tan -ɛ -sɔn nyʋ ke Nyɔsoa a ‑gbʋʋan ke, "kpa ‑ɛ "kpei nyɔ ɔ ‑saa 'sraa, ɩa' ikwɛ- 'a 'sraa ‑saa', -wɛe ɔɔ muɛ 'sraa ‑saʋn ke Israɛ -nyʋ ‑wee' 'a dɛsaʋn 'a ‑kwɛa 'a 'sraa ‑saa' ke-.
34 Ɩ nɩɛ aoa' kɛ' ‑o 'de "nɔ "oo nɔ" ‑wee' 'di: Kpɛ due' 'de ‑sʋn 'di ɛ, Israɛ nyʋ 'a dɛsaʋn 'a ‑kwɛa' 'sraa 'je ‑saa ‑o. Aarɔn nʋ dɩ "klein Nyɔsoa 'tmʋʋa Moisɩ 'mɛ.